Patay ang isa ka priso matapos nakastiguhan sang mga kaupod nga priso bangud sa wala pag-intindihanay kag nag pang-hangkat pa sang tapungolay ang biktima sa kaangay nga priso sa sulod sang Silay City BJMP sang Agosto 12.
Ginkilala ang napatay nga priso kay Jeremy “Jerome” Amando. Samtang ang suspek ang ginkilala kay Elboy Laurista, isa ka mayor sang mga priso sa selda.
Suno kay Senior Inspector Cataloña, Jail Warden sang Silay Bureau of Jail Management and Penology (BJMP) sa interview sang DYHB nga sang Agosto 12 mga pasado las 10 sang aga, may yara sang isa ka film showing nga ginapatigayon sa sulod sang compound sang BJMP kag samtang nagalantaw ang mga priso sang hinali nga ginsaway sang suspek nga si Laurista ang biktima nga si Amando bangud nagagahod ini samtang nagalantaw.
Bangud sa natabo nga pag-saway, nangakig ang biktima kag ginhangkat sini sang tapungolay ang suspek, apang ini ang natambagan sang mga kaupod nga priso.
Dugang pa ni Cataloña, mga pasado la una sang hapon sang matapos ang film showing, liwat nga ginhangkat ni Amando si Laurista kag natabo ang pagtapungolay sang duha, apang bangud si Laurista ang mayor sang selda madamo sa mga kaupdanan sini nga priso ang nagbulig kastigo kay Amando.
Matapos nga na-pacify ang away sang duha, gilayon naman nga gin posasan si Amando kag ginbutang sa separado nga hulot sang prisohan bangud nga padayon ini nga nagawaras kag nagapanghangkat sang away sa kaangay nga priso.
Makalipas ang tunga sa oras nagreklamo sang ka pin-ot sang dughan si Amando, rasun nga gin dapatan ini sang bulong, apang bangud wala sang alibyo kag naga palangluya ang biktima, ini ang ginhingagaw dala sa probinsyal ospital sa syudad sang Silay.
Pag-abot sa ospital ini ang gindeklara sang doktor nga patay, bangud sa mga madamo nga pasa nga naangkon sang biktima dulot sang pagpangastigo.
[image: image.png]
