BAGO CITY, NEGROS OCCIDENTAL – Ginabulubanta nga nagdangat sa kapin P1 million pesos ang kahalitan nga gintuga sang sunog nga nagluntad sa lima tanan ka mga kwarto sang Ramon Torres National High School – Taloc Extension Campus sa sunog nga natabo pasado las 8 sini nga aga.
Suno sang arson investigator sang Bago City Bureau of Fire Protection, SFO1 Raul Diaz nga base sa ila initial findings, electric short circuit ang gintunaan sang amo nga sunog.
Ginpahayag nga kalakip sa nasunog kag totally gutted by fire amo ang duha ka mga computer rooms, duha ka classrooms kag isa ka stockroom.
Samtang, ang initial investigation nagapakita man nga nag-umpisa ang sunog sa stockroom kon diin diri nahamtang ang mga bangko, mga kahoy kag iban pa nga mga kagamitan nga wala na gina-usar sang amo nga eskwelahan.
Apesar nga may ginapatigayon nga klase sang natabo ang sunog, wala sang may ginreport nga nasamaran ukon nahalitan nga estudyante.
Madasig nga nag-respond ang mga katapos sang Bureau of Fire Protection kay may mga firetruck man halin sa Bacolod nga nag-augment agud mapalong ang kalayo. /dyHB BACOLOD
