BACOLOD CITY – Pagpatuman gid lamang sang mando sang korte ang pag-aresto kay Isidro Castillo alyas Ka Jesnar.
Ini ang pahayag ni 303rd Brigade Commander Brig. General Eliezer Losañez sa interview sang dyHb Straight to the Point.
Suno kay Losañez, ang pagdakop kay Castillo santo man sa mando ni President Rodrigo Duterte nga pangsikupon ang sin-o man nga nagasuporta sa New People’s Army kaangay sang mga cause-oriented groups ilabi na ang may pending warrant of arrest.
Si Castillo, 66 anyos, pumuluyo sang Barangay Pahanocoy, Bacolod City sa diin sa report sang Armed Forces of the Philippines (AFP), sadto katapo sang New People’s Army Larangang Guerrilla 2 kag ginkasuhan murder matapos ang ambush sang 2010 sa Cadiz City.
Pinaagi sa warrant of arrest nga gin-issue sang RTC Branch 60 sang Cadiz City, gindakup si Castillo pasado las 12 sang udto sadtong nagligad nga Sabado, Enero 13 sa San Sebastian Cathedral gin-aresto si Castillo.
Angut sini, ginpahayag ni Castillo, anay spokesperson sang National Federation of Sugarcane Workers (NFSW) nga wala gid siya nagdahum nga ini siya ang dakpon bangud wala man gani ini nagapanago kag madugay na nga nagakadto bisan sa iban nga lugar kag may mga kaabyanan man ini nga yara sa utoridad.
Si Castillo ang gin-aresto sang gintingob nga pwersa sang BCPO, CIU, NOPPO PIU, BOIC, 303rd IB, 33MICO, 3MIB, MIG6, ISAFP, 79TH IB kag Police Station 1.
Sa karon detained sa custodial facility sang Police Station 1 si Castillo kon diin wala sang bail nga ginrekomendar sa kaso sini nga murder.
Paagi sa iya abogado nga si anay Councilor Archie Baribar, ila tinghuwaan nga makapost sang pyansa sa sini nga mga inadlaw. / Ricky Filoteo photo/ RMN
