Davao City – Alang ni Salaysay Marilog District Barangay Captain Robert Itdang, sagrado ang commitment sa pagpasakop sa mga political parties ug dili ang pagbalimbing ug pagtraydor sa gipasilungan.
Apan dayag matud pa ni Itdang nga sagad sa atong mga politiko walay baruganan ug wala gasulti og tinuod ilabi na kun wala na sila’y makitang bentaha alang sa ilang pulitikanhon nga damgo balhin dayon sa laing partido.
Gibatbat ni Itdang nga importante kaayo nga dunay barugan ug kumitido sa gipasakupan nga political party ang mga politiko ug dili balimbing kay mao kini ang mupaila kanila kung unsang matanga sila sa pagkalider kung makahawid na og gahum.
Pero subo kaayo kay ang realidad sa sistema sa pamulitika mao nga ang mga pulitiko sa nasud mahilig kaayo mag-lupad-lupad hangtud makatugdong sa laing dapit diin ang magkontra magka-uban ug ang magkauban, kontra na usab sa sunod nga senaryo.
Maut matud pa kini nga praktis ug dili maayo nga ehemplo sa mata sa katawhan apan tungod kay walay mahimo ang mga botante gawas sa pagdawat sa kamatuoran bisan og dayag kaayo ang ilang pagka-traditional politician kun trapo.
Dugang ni Itdang nga uyon kaayo siya nga silotan ang mga politiko kinsa daw alibangbang nga pula og lubot nga magsige og lupad ug tugdong sa laing tampi.
Dili matud pa takos mangalagad sa katawhan ang mga ‘political butterflies’ busa sa piniliay sunod tuig, angay isilsil sa alimpatakan sa mga botante ang dili pagboto sa mga kandidato nga traydor sa ilang mga partido, dugang sa opisyal sa barangay.
RadyoMaN June Duterte
