KABANKALAN CITY, NEGROS OCCIDENTAL – Ginapreparar na karon ang kaso nga reckless imprudence resulting to multiple homicide nga igapasaka batuk sa driver sang jeep nga naaksidente nga nagtuga sang kamatayon sang tatlo ka pasahero.
Ang mga biktima nga pasahero kag driver sang traysikol lakip na ang maestra kag estudyante ang nagkalamaty matapos nga nabungguan sang jeep ang ila ginasakyan nga traysikol pasado las 5 kahapon sang hapon sa atubang sang Villa Concha Subdivision, Brgy. Hilamunan, ciudad sang Kabankalan.
Nakilala ang driver nga si Fernando Mahilum, 35 anyos ang edad, pumuluyo sang Brgy. Camingawan kag amo naman ang driver sang jeep nga may byahe Mabinay-Kabankalan.
Samtang, nakilala naman ang mga nagkalamatay nga amo sanday Edgar Capinig, 56 anyos, driver sang traysiko, Liezel Garzula, maestra sa Central Philippine State University (CPSU) kag Rochel Bartolome, 20 anyos, pumuluyo sang Brgy. Tampalon kag estudyante man sang CPSU.
Base sa panaysayon sang mga pasahero nga tuman ka dasig ang padalagan sang driver sang jeep gani ini ang ila ginsaway, apang wala ini nagpamati kag nag-overtake pa sa ginasundan sini nga jeep.
Nadalasa sini ang traysikol kag bangud tuman ka baskug sang impact, naglabog ang driver sini samtang naipit naman ang mga biktima pasahero nga maestra kag estudyante.
