BACOLOD CITY – Pormal na nga ginlunsar ang pinaka-una kag pinasahe nga journalism award para sa mga estudyante sang pampubliko nga elementarya kag high school sa Negros Occidental.
Ang Tatak RMN Journalism Award 2017 gindihon sang DYHB RMN Bacolod agud nga magkilala kag maghatag pasidungog sa mga deserving campus journalists.
Ini ang bukas sa tanan nga may kinaadman ukon talento kag nagahandum nga mangin reporter ukon anchorman sa radyo sa ulihi.
Ginpahayg ni Radyoman Jeony Bigay, station manager sang dyHB nga sa sini nga tuig, bukas na ini sa mga estudyante sa elementarya kag high school sa bilog nga probinsya sa diin sila ang makabaton sang “specially designed” nga medalya halin sa DYHB.
“Ang mapilian nga awardees pagasab-itan sang medalya sa tion sang ila recognition ukon graduation ceremony”, pahayag ni Radyoman Joeny.
Gintalana ang deadline sa pagsubmit sang mga nominees sa March 16, 2018 sa diin diri na pagasalaon sang screening committee ang mga qualified awardees.
Sa mga interisado nga buluthuan, makig-angot lang sa dyHB, sa RMN Broadcast Center sa 17th Lacson St. ukon magtawag sa 0917-840-9910 ukon sa 0928-741-5661.
Ini isa naman ka tumalagsahon nga serbisyo publiko halin sa certified and official No. 1 nga istasyon nga dyHB-RMN Bacolod nga base sa pinaka ulihi nga official radio survey sang KBP Kantar Media sa September 2017. /dyHB BACOLOD
