Davao City – Walay angay kabalak-an ang mga studyante nga bagohay lang nigradwar sa K-12 program gumikan sa kapin 11-mil ka mga bakanteng trabaho alang kanila.
Kini maoy gibutyag ni Department of Labor and Employment (DOLE-XI) employment focal person Marlito Ayala atol sa pakighinabi niya diin siya mihangyo nga mutambong kadtong mga gusto’g trabaho sa ipahigayong ‘Trabaho, Negosyo, Kabuhayan’ (TNK) Job and Business Fairs sa umaabot nga Mayo 1 ug 2 nga adunay tema nga “Pagpugay sa Manggagawang Pilipino: Dangal ng lahi, kabalikat sa progresibong pagbabago.”
Matud niini, ipahigayon ang maong duha ka adlaw nga aktibidad sa Abreeza Mall of Davao ug SM Mall of Davao diin adunay pagahimoong lima ka adlaw nga pre-registration sa Abril 26-30.
Sumala ni Ayala, ginalauman nga kapin 100 ka mga employers ang motambong ug mas taas nga numero sa mga aplikante kun itandi sa 3, 500 nga natala sa milabay’ng tuig.
Sa ilang datos, adunay napulo ka mga natala nga trabaho ang bankante sa parehong lokal ug overseas diin pipila ang mason, carpenter, ug steelman alang sa lokal samtang nurse, sales associate ug english tutors alang sa overseas.
Tambag sa personahe sa DOLE, mangandam ang mga aplikante pinaagi sa pagsuot og pormal nga sinina ugpagprinta og daghang resume.
RadyoMaN Jason Amisola
