KABANKALAN CITY – Indi makatambong sa graduation ceremony ang iloy sang Kabankalanon nga si Police Cadet Fritz John Napalinga Vallador bisan pa nga ini ang class valedictorian sang Maragtas (Magiting at Responsableng Alagad ng Batas na Gagabay sa Transpormasyong Alay sa Bayang Sinilangan) Class of 2018.
Suno kay Fritz John, wala ginpahanugutan sang iya amu ang iya iloy nga nagatrabaho bilang domestic helper sa Spain nga makapauli sa Pilipinas.
Apisar sina may gatindog man nga iloy sa iya, ina ang iya tiya. Nasubuan man siya bangod ni isa ka bes wala nya gid nakita ang iya amay.
Si Fritz John ang 24 anyos, gikan sa Barangay IV syudad sang Kabankalan.
Naggraduate sang elementarya sa ERAMs West sang 2007 kag sa Fortress College naman sang 2011 sa iya High School.
Nag-eskwela sang Bachelor of Science in Criminology sa Bago City College (BCC) sang 2012-2014 kag nangin consistent BCC Honors Society Top 10 Awardee.
Siya ang mangin Commencement Rites Speaker sang Bago City College sa maabot nga Marso 27 la una sang hapon sa Bago City Coliseum.
Si Fritz John ang nagpanguna sa 106 ka mga cadete sang PNPA Class 2018 sa diin ginabug-usan ini sang 97 ka lalaki kag 27 ka babaye. Ang 76 ang magasulod sa PNP samtang ang 13 naman ang sa BJMP kag 17 sa Bureau of Fire Protection.
Ini ang tagaan sang degree nga Bachelor of Science in Public Safety sa diin pagkatapos sang graduation sa Marso 23 sa Camp Mariano Castañeda sa Silang, Cavite, ini ang may ranggo na nga Inspector.
Si Fritz John ang makabaton sang Presidential Kampilan Award kag Plaque of Merit gikan kay President Rodrigo Duterte.
