Kadagkuan sa PNP taghanap an layaki na posible na tag-ija sa nagkadugo na baro sa Narciso St., Surigao City
Hangtud sa pagkakuman taghanap pa nan kadagkuan sa PNP an layaki na posible na tag-ija sa nagkadugo na baro na nabilin sa may Narciso St., Surigao City.
Mismo an Chief of Police na si Supt. Jay Baybayan an una na nakadawat nan tawag ganinang buntag gikan ni Vice Mayor Alfonso Casurra na nagpahibayo kabahin sa dugo na nagkanat sa dayan dapit sa may bunkhouse nan TKY Gen. Merchandise ug tagtuohan na gikan sa isa ka samdan na layaki.
Sa pamahayag nan mga okupante sa bunkhouse, alas 6:00 ganina buntag ila nadiskubre an dugo sa may semento gawas sa ila bunkhouse. An mga nagkadugo amo an isa ka karsones, sleeveless shirt ug kitchen knife. Sa pagpakisayod pa sa CCTV footage gawas sa Casurra Law Office, alas 2:39 sa kaadlawon ganina nakit-an an isa ka layaki na nagsukbot na lamang nan underwear nagpanaw pasingod sa Eva Macapagal Passenger Terminal.
Dugang pa ni Supt. Baybayan, tagpasubay na nija sa ija mga imbestigador pero wayay makatudlo kon sin-o an identidad sa layaki lakip an mga hospital, wayay ila na-trace kalabot sa posible na tagbuno o ba kaha nagsuway sa pagpakamatay.
