BACOLOD CITY – ( UPDATE ) Ginpatigayon sini nga adlaw ang pagsugilanon sa tunga sang Kadamay Negros, National Housing Authority – NHA kag ciudad sang Bacolod para negosasyon angut sa hingyo sang Kadamay nga i-occupy ang mga housing units sa Brgy. Felisa nga wala pa na-istaran.
Ini matapos nga kahapon sang aga, Agosto 30, nagluntad ang tensyon kasunod nagtuyo ang grupo sang KADAMAY Negros nga magsulod kag i-occupy ang mga housing units sa Ciudad Felisa Housing Project sa Brgy. Felisa.
Ang amo nga housing project ang gintukod para sa mga uniformed personnel sang PNP kag AFP sa idalum sang National Housing Authority.
Nahibaluan nga may kapin sa 1,498 ka mga units ang balay nga gin construct sadtong 2015 pa apang 8 pa gid lamang ka mga units ang na-occupy sang mga pulis.
Angut sini ginpahayag ni Bacolod City Council Renecito Novero nga naka-kadto na sa iya ang mga lideres sang Kadamay agud magpangayo sang bulig nga kon mahimo nila ma-occupy ang mga balay nga wala man gina-istaran.
Ginpahayag nga apesar sang tensyon kahapon sang aga, may masobra gihapon isa ka libo ka mga katapo sang Kadamay ang nagtiner sa amo nga housing project tubtub kagab-I kag ang iban didto na nagtulog.
Nag-reklamo naman ang mga miembro sini matapos sang nangin tikang sang Bacolod City Police Office nga idumili ang pagsulod sang pagka-on kag tubig matapos nga ila gin-occupy ang mga housing units.
Sa pihak nga bahin, gindayaw naman sang rebelding hubon sang New People’s Army ukon NPA ang ginhimo sang grupo nga KADAMAY-Bacolod.
Sa statement nga ginpagwa sang Leoanardo Panaligan Command, New People’s Army – LPC NPA, Cnetral Negros Guerilla Front pinaagi sa spokesperson sini nga si Ka JB Regalado, gindayaw sini ang ila ginakabig maisog, makatarungan kag ensakto nga panahon sa pag-posisyon sang KADAMAY Bacolod sa amo nga housing project.
Samtang angot sa negosasyon, la 1:38 subong nga hapon wala pa gihapon naresolba ang mangin tikang sang NHA sa isyu kag kon bala ipadayon pa sang Kadamay ang ila pag-occupy sa site. /dyHB BACOLOD
