Davao City – Daw walay bilib ang Kalipunan ng Damayang Mahihirap (KADAMAY) Davao City Chapter sa pito na ka tuig nga liderato sa dakbayan sa Davao ilawom ni Mayor Inday Sara Duterte-Carpio.
Matud ni KADAMAY Davao City Focal Person Toto Bolcan, ang liderato ni Mayor Inday wala magsilbi sa mga kabus kun kinatibuk-an apan naghikutar lamang kini sa mga dato kun sa mga kwartahan.
Gani, buhing kamatooran niini ang mga barangay nga gipuy-an og daghang mga pobre nga padayong walay konkretong mga programang magpabadbad sa higot sa kapobrehon alang sa mga kabus.
Segun ni Bolcan nga ubos sa pagdumala sa presidential daughter, mas midato pa og maayo ang mga kwartahan samtang ang mga pobre, mas misamot og kamang sa kalisud sa kinabuhi.
Kung aduna ma’y nabuhat ang alkalde sulod sa pito ka tuig niyang pagdala sa renda sa lokal nga kagamhanan sa dakbayan, kana mao ra ang imprastraktura pinaagi sa tabang sa ‘Build,Build,Build’ mega infrastructure program sa national government.
Apan bisan pa man niini, gisulti ni Bolcan nga ablihan pa gihapon niini ang iyang mga dalunggan aron iyang mabati ang mensahe ni Mayor Sara sa iyang 7th State of the City Address kun SOCA karong hapona.
Nanghinaut usab ang veteran militant leader nga abli usab si Mayor Inday sa bisan unsa nga kritisismo sa mga tawong wala matagbaw ug makontento sa istilo sa iyang pagdumala sa dakbayan.
Hinoon, andam mutabang ug mosuporta ang maong militant sector leader sa lokal nga kagamhanan aron kahatagan og katumanan ang mga proyekto ug mga programa nga ikaayo sa tanang mga lungsuranon ning atong lokalidad.
RadyoMaN Joel Viray
