General Santos City–Nanawagan karon si Gensan City Councilor Jeng Gacal ngadto sa publiko atol sa gihimong committee hearing kabahin sa mga investment scheme sa syudad nga magpasang-at na ug kaso sa ngadto sa mga misibat sa ilahang kwarta.
Sumala pa ni Kagawad Jeng Gacal nga bisan sa kadaghan sa mga nabiktima sa maong mga investment scheme natingala kini nga gamay palang ang nahidangat sa buhatan sa NBI, CIDG ug GSCPO aron sa pagpasang-at ug kaso.
Sa nakit-an niini naga duha-duha pa ang mga investor nga mag pasang-at ug kaso ngadto sa mga nangilad kanila tungod sa mga pasalig sa mga investment company nga ibalik ang ilahang mga kwarta.
Dugang pa ni Gacal nga gina-delay lang sila sa maong mga kompanya aron nga makapangita sila ug pamaagi nga musibat ug makagawas sa nasud.
Nasayran nga mukabat ngadto sa 32 lang ka mga reklamante sa KAPA ang miduol sa NBI aron nga mopasang-at ug kaso samtang anaa usab sa 152 ka reklamante sa ALAMCCO, 271 sa PPM, 32 sa Shantal, 71 sa NMC ug gatosan usab ang reklamante sa uban pang mga investment scheme nga naga-operate sa syudad kung asa anaa sa P2,454,228.123 ang kinatibuk-ang kantidad niini.(Dave Silagan)
