General Santos City–Dismayado si Kagawad Atty. Edmar Yumang ang chairman sa Committee On Peace And Order sa Sangguniang Panglungsod sa pagkasikop sa usa ka Traffic Enforcer nga Si Joel Cortez Turado, 33 anyos, nanimuyo sa Brgy.Fatima human nga nadakpan sa kapulisan nga namaligya ug ginadiling droga niadtong milabay nga semana.
Sumala pa ni Kagawad Yumang nga isip miyembro sa lokal nga panggamhanan sa Gensan kinahanglan nga sundon gayud ang anaa sa balaod ilabi na sa balaod sa trapiko.
Saysay usab sa opisyal nga kung dili nila kaya ang gamay nga sweldo mas maayo nga mopahawa nalang ug mangita ug laing trabaho inay nga hugawan ang imahe sa lokal nga panggamhanan sa dakbayan nga giampingan sa katawhan ingon man ni Mayor Ronnel Rivera.
Pagpaklaro ni Kagawad Edmar Yumang nga posibleng matanggal sa trabaho ang nasampit nga Traffic Enforcer human nga nakuhaan kini ug droga sa iyang posisyon atol sa gipahigayong buy-bust operation sa mga personahe sa City Police Drug Enforcement Unit kon CPDEU.
Asoy man usab ni Yumang nga wala nila ginapanalipdan ang si kinsa mang empleyado sa gobyerno nga naghimo ug kabuang sa ilang trabaho ilabi na ang maong Traffic Enforcer nga sumala pa nga atubangon na lamang niini ang kasong pagsupak sa RA 9165 nga ipasang-at batok kaniya.
Nagplano usab ang opisyal nga mopahigayon ug drug testing sa tanang empleyado sa gobyerno, mga brgy.opisyal ingon man sa mga miyembro sa kapulisan gumikan kay duna matud pay pondo nga iyahang iduso sa konseho karong umaabot nga tuig 2020. (Reynald Timario)
