Kagawad nga tag-iya sang batchoyan gintiro samtang nagalantaw sang TV

329

MURCIA, NEGROS OCCIDENTAL – Patay ang barangay kagawad sang Brgy. Sta. Rosa, banwa sang Murcia matapos nga ginluthang sang duwa ka mga lalaki kagab-i sa sulod mismo sang iya puluy-an sa Hacienda Wawa.

Ang biktima nakilala kay Celso Meñoso, 52 anyus kag barangay kagawad sang Barangay Santa Rosa.

Suno sa hepe sang Murcia PNP, PSInsp. Ronald Santillan nga ang biktima ang nagapanag-iya sang batchoyan sa lugar sa diin nagpakuno-kuno naman customers ang mga suspek.


Nagtinguha pa nga magpalagyo si Kgwd. Meñoso apang ini ang ginlagas pa sang mga suspek tubtub nakalab-ot sa ila kusina kag didto gintiro pa gid sang makapila ka beses.

Narecover sa crime scene ang anum basiyo sang kalibre 45 nga pistola kag 9mm.

Sa interview sang dyHB sa asawa nga si Aida, pasado las 7 sang gab-i nagapanghugas sya sang pinggan sang nakabati siya sang lupok sa sala sang ila puluy-an sa diin didto nagalantaw sang balita sa telebisyon ang iya bana.



Nakibot naman siya nga may duha ka mga tawo nga nagsulod sa kusina sa diin didto nagpalagyo ang iya nga bana apang nakita niya gid nga gin-finishing ini sang duha ka mga suspek.

Antis palang sina, may ara sang apat ka mga tawo sakay sa duha ka motor nga nag-order sang batchoy apang pila ka minutos naglisensya nga indi nalang sila magkaon kag naglakat.


Pagpati niya nga ang mga tawo nga una nag-order sang batchoy amu man ang mga suspek sa diin iya nakit-an nga ang duha ka mga driver sa motorsiklo ang may tabon sa guya. Wala naman sang tabon ang nawong sang duha ka mga gunmen.

Wala sang may nakit-an nga anggulo ang asawa ukon madalum nga rasun para himuon ang pagpatay sa iya nga bana.

Si Kagawad Meñoso ang first term kagawad pero makaduha man ini ka term nga nagpapili apang napierde. Siya man ang bookkeeper man sang Hacienda Wawa nga ginapanag-iyahan ni Carlo Tinsay.

Dumduman sang asawa nga sang nagligad nga adlaw may nakabais ini sa belasyunan ukon haya sang asawa sang ila anay kapitan man sang barangay. Apang ang amu nga binaisay ang nahitso man matapos nga natambagan.

Ang mag-asawa ang may bata nga lalaki nga naga-edad sang 13 anyos nga ara sa pihak nila balay sang natabo ang pagpangluthang.

Patal nga pila sa ulo, dughan kag likod ang naagom sang kagawad nga gintunaan naman sang iya gilayon nga kamatayon.

Sa bahin naman sang Murcia Police, padayon pa nga gina-establish nila kon ano motibo sa pagpatay sang amo nga barangay kagawad.

Facebook Comments