ISABELA – Boluntaryo nga nagsungka kaina sang aga sa mga kapulisan ang bana nga nagbuno sa iya asawa sadtong Domingo sang hapon sa Hacienda Alicante, Barangay Bungahin.
Ang suspetsado nga detenado subong sa custodial facility sang Isabela Police Station amo si Arnaiz ‘Apid’ Arevalo, 27 anyos.
Madumduman nga ginbuno sang makatatlo ka beses ni ‘Apid’ ang iya asawa nga si Angela Pojas-Arevalo, 25 anyos nga Overseas Filipino Worker sa Kuwait kag tumandok sang Isabela sang nagpadulong ang misis sa ila nga balay para kuhaon ang duha ka mga kabataan.
Ang mag-asawa ang may apat ka tuig kag pito nga bata nga babaye kag lalaki.
Suno kay PSInsp. Randy Babor, hepe sang Isabela Police Station nga indi makabig nga arestado ang suspetsado bangud kay boluntaryo ini nga nagsungka sa kapulisan.
Kaso nga parricide ang natalana nga ipasaka batuk sa suspetsado.
Sa exclusive interview sang dyHB kay Apid, iya ginsiling nga kalain sang buot ang nagtulod sa iya para himuon ang kremin.
Indi nya mabaton nga nagdala lalaki ang iya asawa sa ila nga lugar sa pagpauli sini gikan abroad.
Masakit para sa iya kag insulto nga wala man sila nagbulagay, kuhaon sini ang kabataan upod na ang kerido sang iya asawa.
Sang ginpamangkot kon bala palangga nya pa ang iya asawa, iya ginsiling nga ‘huo’ pero indi nya lang mabaton nga ibaylo sya sa iban bisan pa nga wala man sila pormal nagbulagay.
