Kalabira sa babayeng kanhi NPA, nakalot

43

Nakalot ug na-recover sa mga sundalo sa 4th Infantry Division ang kalabira sa usa ka babayeng kanhi sakop sa New Peoples Army kon NPA mga alas 12:30 sa udto niadtong Martes sa hilit nga dapit sa Sitio San Martin, Barangay Adtuyon, lungsod sa Pangantucan, Bukidnon.

 

Ang naka-recover sa maong kalabira ang mga sakop sa 1st Special Forces Battalion uban sa kapolisan sa lungsod sa Pangantucan.


 

Si  Lt. Col. Sergio Macarandan Jr. , Commander sa 1st Special Forces Battalion sa Philippine Army ang mipa-ila sa maong kalabira nga mao si Merlyn Hinganon Panta alyas GENEVIVE.

 

Matud ni Macarandan nga si Genevive kanhi sakop sa Guerrilla  Front 68 sa NPA nga nag-operate sa Northern Mindanao  Committee ang gipatay sa suspect nga si Jovelito Tonlacan Pontillas Jr., alyas Zelong ug Jovy niadtong bulan sa  June 2018.

 

Gibutyag ni Macarandan nga ang maong biktima namatay human gidunggab ni Pontillas nga Commanding  Officer 1,  sa Sub-Regional Operation Command, Sub-Regional Committee 4 sa mga rebildeng NPA.

 

Ang patayng lawas sa biktima gilubong sa maong suspect sa awa-aw ug hilit nga dapit sa Sitio San Martin, Barangay Adtuyon sa Pangantucan.

 

Matud ni Macarandan nga si Genevive, gi-akusahan sa ilang commander nga si Pontillas nga “spy” sa mga sundalo sa gobyerno tungod sa daghang sakop sa NPA ang mi-surender niadtong milabayng tuig.

 

Ang pagka recover sa kalabira sa patayng lawas ni Genevive, resulta sa report sa usa ka rebel returnee nga na-ila sa alyas nga “ Bandido”

 

Gitudlo ni Bandido sa mga sundalo sa 4th ID, asa gilubong ang patayng lawas ni Genevive.

 

Matud ni Bandido nga iyang nakita gi-unsa pagpatay ug paglubong ni Pontillas si Genevive.

 

“Gigukod ko sa akong konsyensya, nga sugod atong nakita nako ang walay kaluoy nga pagpatay pinaagi sa pagdungab kang Genevive sa among kumander nga abi nila ahente sya sa sundalo kaya gipatay sya, nga ilang sulti nga trayador kuno sa kalihukan, bakak man  tong ila”  ( NPA commander ) matud ni Bandido.

 

Ang kalabira sa patay’ng lawas ni Genevive gidala sa Pangantucan Funeral Homes.

Facebook Comments

From Advertisers