BACOLOD CITY – Ginpa blotter sang isa ka tenant ang tag iya sang building nga iya gina-rentahan matapos nga ginpaguba niya sini ang kalan-an sang tagreklamo.
Si Glenda Samodio, 53 anyos ang edad, pumuluyo sang Purok 3, Punta Magsungay, Brgy. Singcang Airport, Bacolod City ang nagpadulong sa Police Station 1 agud ipa-blotter si Roberto Roy Mirasol, 50 anyos ang edad.
Si Mirasol ang tag-iya sang Mirasol Tire Supply nga nahamtang sa Rizal Street, Brgy. 21 kon sa diin naga-arkila diri si Samodio para sa iya kalan-an ukon restaurant.
Apang, mga las 2:45 kahapon sang hapon, nakibot na gid lamang si Samodio sang nakita nga gin-guba ni Ron-ron Laranio na pwertahan sang iya kalan-an.
Sang iya gin-kumprontar si Ron-ron, ginsiling sini nga helper siya ni Mirasol kag ginsugo siya sang iya boss nga guba-on ang iya kalan-an.
Ginreklamo sang tenant nga wala labot sang pagpang-guba, nadula pa ang iya 2 ka fiber glass nga lamesa nga nagabili sang kapin 12 mil pesos.
