NAGPADAYON ang hugot nga kampanya sa Pangagamhanang Probinsyal sa Bukidnon, pinaagi sa Provincial Health Office (PHO) batok sa makamatay nga sakit nga dengue luyo sa pandemya nga dala sa COVID-19, gumikan sa taas nga natalang kaso dinhi sa probinsya.
Basi sa datus, as of March 22, 2021, nga nakuha gikan sa buhatan sa PHO, pinaagi ni Engr. Florissa Adviento, Environmental Health Cluster Chairperson, mikabat sa 63 ang natala nga kaso sa dengue sa tibouk Bukidnon diin 62 niini ang buhi samtang 1 ang namatay. Nag-una sa pinakadaghan ug kaso ang dakbayan sa Malaybalay nga adunay 16, nagsunod ang lungsod sa Quezon nga adunay 12, 5 sa Cabanglasan ug Maramag, 4 sa dakbayan sa Valencia ug Malitbog, 3 sa Kitaotao, Manolo Fortich ug Pangantucan, 2 sa Dangcagan, Don Carlos ug Impasugong ug 1 sa Kalilangan.
Dugang ni Engr. Adviento nga padayon ang ilang monitoring and surveillance activities ngadto sa mga Local Government Units (LGUs) ingon man sa Bukidnon Provincial Hospitals ug pagpahigayon sa clean up drive nga nagtumong sa pagpangita sa breeding site sa mga lamok ug pag-guba niini. Gitahasan usab ang Rural Sanitary Inspectors ug Barangay Sanitary Inspectors nga maoy manguna sa maong mga kalihukan sa ilang tagsa-tagsa ka munisipyo ug barangay.
Kahinumduman nga mipagawas si Bukidnon Governor Jose Ma. R. Zubiri, Jr. ug Memorandum Order Number 514 pinitsahan Mayo 8, 2020 nga nagmando sa mga City/Municipal Health Officers ug mga Barangay Captains sa pagpadayon sa pagpromotar sa adbokasiya ug implementasyon sa 4S-Strategies sa tibuok probinsya sa Bukidnon aron mabatukan ang sakit nga dengue, lakip na dinhi ang tanang residente ug mga establisamento nga mopahigayon sa maong kalihukan aron ka-protektahan ang mga empleyado ug mga kostumer.
Ang 4S strategy mao ang “Search and destroy” mosquito-breeding sites, “Self-protection measures”, sama sa pagsuot ug long pants ug long sleeved shirts, ug pagamit sa mosquito repellent, “Seek early consultation” ug “Support fogging/spraying” sa mga lugar nga taas ang kaso sa dengue.
