Davao City- Nanawagan karon ang Department of Health XI sa publiko nga dili pasagdan ang mga sakit sa panit ug ipatambal dayon kini.
Gibutyag ni DOH XI Leprosy Control Program Medical Coordinator Dr. Vergel Bautista nga nisaka og 39.2 porsyentos ang kaso sa leprosy o sangla dinhi sa rehiyon , gikan 125 niadtong 2016 nisaka kini ngadto sa 174 ka kaso sa tuig 2017.
Ang Davao del Sur adunay pinakadaghang bag-ong natala nga kaso sa leprosy nga 19 samtang ang laing mga probinsya anaay 5-8 ka kaso.
Matud ni Bautista nga importante nga sayo nga mahibaw-an ang kondisyon aron nga dali kining matambalan.
Adunay programa ang gobyerno nga “Kilatis Kutis” diin libreng makakuha og tambal ang mga tao nga adunay leprosy.
Ang sangla usa ka chronic infectious disease mugna sa rod-shaped bacillus mycobacterium leprae, motakud kini pinaagi sa laway ug sip-on gikan sa baba ug ilong sa usa ka sanglahon.
Makamugna kini og permanente nga kadaot sa panit, mata, mga ugat ug sa tibuok lawas nga makaparalisar sa tawo kung dili dayon kini matambalan.
Saulogon sa DOH Davao Region ang leprosy day sa Bansalan, Davao del Sur uban sa tema nga “ Fighting Disease, Poverty and Prejudice”, aron sa pagdasig sa mga katawhan nga magpakabana bahin sa sangla ug magpatambal aron dili mudaghan ang mga pasyenteng adunay susamang balatian sa panit.
RadyoMaN Aimee Guinita
