Roxas City, Capiz – Dakop ang tatlo ka mga persona sa ginkasa nga drug buybust operation sang Station Drug Enforcement Team sang Roxas City Police Station sa Barangay Tiza, Roxas City. Ginkilala ang mga suspek nga sanday Leo Gaborne, 40 anyos, sang Barangay Tanque, Geno Moises Alejaga, 22 anyos, sang Barangay Tiza kag Billy Gaborne, 43 anyos, sang Barangay 8, lunsay mga taga syudad sang Roxas.
Nakuha sa kamot sang mga suspek ang lima ka sachets sang suspected shabu nga ginabulubanta nagabalor P12, 000, tatlo ka cellphone, P1, 000 nga buy bust money kag isa ka motorsiklo. Yara na nakahunong sa lock-up cell sang Roxas City PNP ang mga suspek kag natalana nga pagapasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
Nahibaluan nga madugay na nga ginpaidalom sa monitoring sang mga otoridad ang illegal nga buluhaton sang mga suspek antes ginkasa ang operasyon.
