Laing kapildihan ang naangkon sa Communist Terrorist Group New Peoples Army human giguba sa tropa sa 29th Infantry (Matatag) Battalion ang ilang kampo sa Barangay Mahaba, Cabadbaran City, Agusan del Norte niadtong Marso 30.
Dead on the spot ang usa ka miyembro sa NPA samtang walay natalang samdan sa hanay sa militar sa upat ka oras nga binayloay og bala.
Narekober sa area ang usa ka M16 5.56mm rifle, tulo ka AK-47 rifle ug pito ka backpacks nga dunay sulod personal nga mga gamit.
Sa wala pa mahitabo ang engkwento, daan nang nakadawat og impormasyon ang 29th IB nga dunay planong pagpamatay ang NPA alayon sa ilang anibersaryo.
Nasumpo ang maong plano human misumbong ang mga sibilyan sa maong dapit ug didto natultulan sa militar ang hideout sa mga NPA.
Samtang, mipaabot sa iyang pahasubo si Lt. Col. Warren Munda, ang commanding officer sa 402nd Infantry Brigade ngadto sa pamilya sa namatayng NPA ug gisiguro niining mahatod ang patayng lawas sa iyang pinuy-anan.
Sa iyang bahin, padayong nanawagan si Col. Maurito Licudine, ang Commander sa 402nd brigade ngadto sa mga sakop sa NPA nga mo-surrender na aron maka-avail sa E-CLIP program sa gobyerno.
