Nanumpa na ang mga kanditato ubos sa Padayon Pilipino nga gilangkoban ni Gov. Yevgeny Emano, pito ka mga board member,14 ka mga mayor, 16 ka bise mayor ug 120 ka mga kagawad sa Tagoloan Dome ganinang buntag.
Gi-request ni Governor Bambi Emano si Hon. Porferio Duque Jr., ang Kapitan sa Barangay Eurika, Gingoog City nga maoy magpapanumpa kaniya.
Masulob-ong mihatag sa mensahe ang gobernador uban sa pag-ingon nga “Happy, sad, bitter, sweet” ang nahimong dagan sa piliay sa milabayng bulan sa Mayo ilabina ang kamatayon sa ilang amahan nga si Kanhi mayor Vicente “Dongkoy” Emano.
Matud sa gobernador nga mas maayo pang napildi siya sa iyang kandidatura ug nabuhi pa ang iyang amahan.
Nangayo usab kini’g pasaylo sa mga kauban niya sa partido nga wala makadaog sa miaging piliay tungod kay dili matud pa niya kayang dalhon ang tanan sa kadaogan.
Sa nahibiling last term sa gobernador, mipasalig kining unang hatagan sa pagtagad ang pagbalhin sa Provincial Jail aron mahatagan sa kaarangan ang mga piniriso ug ang water system sa lalawigan dili lamang sa lungsod sa Tagoloan.
