Sikop sa gihimong pursuit operation sa kapulisan ang kanhi barangay chairman sa Lanao del Sur, human ang nahitabong pagpamusil sa usa ka kanhi barangay chairman usab sa Marawi City niadtong Sabado, Septembre 14.
Sa impormasyon nga gipaabot ni Police Colonel Madzgani Mukaram, nasikop si Abdullah Guru Aguam, 28 anyos, kanhi kapitan sa barangay Panggao Lupa, sakop sa lungsod sa Ganasi, Lanao del Sur, samtang nagpahigayon og pursuit operation ang kapulisan human gipusil sa wala mailang riding in tandem ang usa ka kanhi kapitan sa Barangay South Madaya, Marawi City atubangan mismo sa iyang anak nga maoy kasamtangang chairman sa maong barangay.
Ang pagpamusil niadtong Sabado nahitabo sa Barangay Brrio Green sa Marawi City kung asa temporaryong nagpuyo ang pamilya ni kanhi Kapitan Carlou Ala, human maguba ang ilang pinuy-anan sa South Madaya niadtong Marawi siege sa tuig 2017.
Ang South Madaya naa sulod sa most affected area.
Miingon si Mukaram nga suspek si Aguam sa pagpatay kang Ala kauban ang laing duha pa nga lakip gi-aresto, lima ka oras human sa maong pagpamusil.
Gawas sa alegasyon nga si Aguam ug ang laing duha ka kauban maoy mihimo sa kremin, mga kasong paglapas sa Dangerous Drugs Act o Republic Act 9165 ug illegal nga paghupot og ihalas nga armas usab ang gi-atubang sa tulo.
Naaktuhan pa ang tulo nga nag-pot session sa usa ka dapit sa Barangay Poblacion Marawi kung asa sila gisikop.
Nakuha gikan kanila ang usa ka armas ug mga bala ug duha ka sachet sa gitouhang shabu ug mga paraphernalia.
Gitakdang mahuman ang proseso sa pagpasaka og kaso batok sa tulo.
