Dipolog City-Giila isip usa sa mga 100 ka Most Influential Filipino Women in the World sa Filipino Women’s Network si kanhi Dipolog City Mayor Evelyn Tang Uy. Ang pasidungog gidawat ni Uy atol sa Gala Awards Ceremony sa 15th Filipina Leadership Global Summit nga gipahigayon didto sa St. Pancras Renaissance Hotel, London, United Kingdom kaniadtong Setyembre 12-17 2018 .
Nasayran nga si Uy gihatagan ug award sa FWN ubos sa FOUNDER ug Pioneer Category. Siya napili gikan sa talaan sa outstanding field nominees sa tibuok kalibotan, nga girekomendar sa mga kanhi global awardees.
Dugang nasayran nga ang matag nominado gipailawom sa makuting pagproseso sa mga sakop sa selection committee nga naglangkob sa mga kanhi global awardees usab.Sila napili base sa sa gidak-on sa ilang posisyon, sa impluwensya sa ilang industriya ug komunidad ug uban pa.
Ang Global FWN 100th Women gilangkuban sa mga magpapatigayon, mga lideres sa komunidad ug gobyerno ug mga ehekutibo /managers sa mga dagkong korporasyon ug organisasyon. Sila ang mga nahimong ehemplo ug inspirasyon sa mga kababayen-an nga naghimo ug mga ekstraordinaryong mga lihok aron madasig ang mga kabataan nga mahimong mga lideres sa umaabot.
Matud pa ni Dr. Maria Beebe, FWN’s board chair nga sa kasamtangan si Uy usa ka bilinhong tambayayong sa pagtabang sa FWN sa pagpalambo sa mga kwalipikadong lideres sa Filipina community ug pagpauswag kanila nga mosaka ngadto sa posisyon nga “presidente” sa tanang sektor sa global economy.
Giila usab uban ni Uy atol sa awards ceremony sila si Atty Lorna Kapunan, ug ang kasamtangang deputy speaker of the Philippines’ House of Representatives, Cebu Congresswoman Gwendolyn Garcia.
Mikuyog kang Uy didto sa awards rites si Myrna T. Yao, kanhi Commissioner sa National Commission on the Role of Filipino Women (NCRFW) ug kanhi Presidente sa Federation of Local Councils of Women (PFLCW) ug usa usab ka awardee sa mga nakalabay’ng tuig.
Si kanhi Mayor Evelyn Uy mao ang kasamtangan Presidente sa Philippine Federation of Local Councils of Women ug Council Board President sa Girl Scouts of the Philippines-Zamboanga del Norte Chapter. (CIO/ebp).
