TACLOBAN CITY – Ginseselebrar yana han Pilipinas an National Family Week, sanglit iginduon ngan iginkakabaraka han simbahan an paggamit han pamilya ha social media.
Sumala kan Pedro Bimbo Tan, usa nga leader han Church Of Jesus Christ Of Latter-Day Saints (LDS) ha Tacloban, nakaka-alarma an paggamit han social media tungod nga diri nagkakauro-istorya an mga myemro han pamilya tungod han internet.
Usa ini nga simbahan an mayada adbokasiya para buligan an pamilya ha pagkontrol paggamit han social media.
Dugang ni Tan, diri maraot an paggamit han social media tungod nga nakakabulig ini para makig-istorya ha mga kasangkayan, mahibaro han mga impormasyon ngan iba pero kinahanglan may control ha paggamit hini.
Basi ha Digital Report 2018, 67 million nga mga pilipino in mayada social media accounts ngan nasobra tulo ka-oras an paggamit hini han mga pinoy ha usa kaadlaw, ilabi na an paggamit han facebook..
An celebration han National Family Week in nagtikang dida han Setyembre 23 tubtob Setyembre 29 basi ha Presidential Proclamation No. 60 issued on Sept. 28, 1992. Ini in para makasabot an publiko kun ano an mga problema nga iginkaka-atubang han kada pamilya ngan pamaagi para masolusyunan ini.
