Possible nga gisundan ayha gipusil ang usa ka kanhi informant sa NBI nga si Aresteo Agbu sa Balongis Balulang ning syudad kagahapon sa buntag.
Nasayran nga dead on arrival nga gideklara ang biktima sa JR Borja General Hospital.
Sa imbestigasyon sa kapolisan, narekober sa area ang basiyo sa bala sa wala pa matinong klase sa armas.
Samtang gibutyag sa ig-agaw sa biktima nga si Police Corporal Canios sa police station 4 Carmen nga igo na lang siya nakadawat og tawag sa pagpusil patay sa iyang ig-agaw.
Matud ni Corporal Canios nga usa ka company guard ang trabaho sa iyang ig-agaw nga si Aresteo Agbu, ug aduna kini sideline nga modeliver og tableya.
Wala usay nasayran si Corporal Canios nga adunay atraso si Agbu ug wala usab kini nalambigit sa illegal nga binuhatan.
Sa karon ila pang sutaon kung unsa gyud ang hinungdan sa pagpusil patay kang Agbu.
