Gitabangan sa Philippine Army 8th Infantry Battalion ang kanhi miyembro sa New Peoples Army nga si Ana Mae Namatidong kinsa nanganak niadtong milabay’ng semana.
Nasayran nga nagbati si Namatidong sulod sa kampo sa militar sa Impasug-ong, Bukidnon hinungdang dali kining gidala sa mga sundalo sa Health Center sa maong lugar.
Mitulo pa ang luha ni Namatidong dihang nakita na niini ang iyang gipakatawong anak nga lalake tungod kay nahuna-hunaan niini ang kalisod nga iyang nasinatian dihang miyembro pa siya sa NPA kinsa nagtago-tago sa kabukirang bahin.
Sa gipakitang kaayo sa militar, giaghat ni Namatidong ang uban pang miyembro sa NPA nga mobalik na sa sabakan sa gobyerno.
Samtang, matud ni Lieutenant Colonel Ronald Ilana, ang commander sa 8th Infantry Battalion, ang maong binuhatan nagpamatood nga andam ang militar sa pagsuporta ug pagtabang sa mga nanginahanglan.
