Nasikop sa mga personahe sa Police Station Three Agora ang kanhi preso ug suspect sa pagpangdunggab niadtong Disyembre 31, 2018 sa Coastal Road, San Isidro Labrador, Lapasan ning syudad.
Kini atol sa gihimong follow-up operation sa kapulisan kagahapong adlawa, new year’s day.
Ang suspect mao si Renato Maturan, 49 anyos, walay trabaho, ulitawo ug residente sa maong dapit.
Nasayran nga ang suspect, positibong gitudlo sa mga saksi nga maoy nidunggab sa biktimang si Donald Jablen, 28 anyos, ulitawo ug silingan sa suspect.
Si Jablen, nakaangkon sa duha ka samad dinunggaban gamit ang usa ka tari sa manok.
Nasayran usab nga ang suspect kanhi piniriso sa Davao Penal Colony sa kapin napulo ka tuig tungod sa kasong robbery ug illegal possession of explosives.
Gikabutyag nga selos ang nag-unang motibo sa krimen samtang ang suspect pasakaan og kasong frustrated murder.
