Patay sa operasyon ang target suspek sa Polomolok PNP sa gipahigayong buy-bust operation alas 11:20 sa buntag sa panimalay niini human matud pa sa kapulisan, misukol atol sa operasyon.
Gi-ila ni Police Major Rommel Hitalia, Deputy Station Commander sa Polomolok MPS ang suspek nga si Anthony Marquez Verdida alias “Nonoy Verdida”, 51 anyos, minyo ug residente sa Purok 7, Barangay Glamang, Polomolok,South Cotabato.
Matud ni Hitalia, gilusad sa hiniusang pwersa sa Polomolok MPS, SCPMFC, sa pakig-alayon sa PDEA 12 kung asa dihang natigayon na ang operasyon nakamatikod matud pa ang suspek nga pulis ang iyang katransaksyon mao nga kalit kining mikuha sa iyang kalibre .45 nga pistola dayon gipabuthan ang operatiba.
Tungod niini, nahitabo ang pagbinaylu-anay ug bala sa pusil nga miresulta sa pagkaigo sa suspek. Gilayong gidala sa Polomolok Municipal Hospital ang nasangpit apan gideklarang dead on arrival sa attending physician.
Narekober sa kapulisan sa crime scene ang usa ka homemade nga kalibre .45 nga pistola ug upat ka sachet sa gituohang shabu apil na niini ang napalit sa pulis.
Gibutyag ni police Major Hitalia, kanhing surrenderee ang suspek ug nakahuman sa CBRP nga programa sa gobyerno apan wala mi-undang sa iligal niining gimbuhaton nga pagpayuhot ug iligal nga droga hinungdan nga ila kining gipahiyonan ug operasypon nga miresulta sa kamatayon niini.(RV)
