General Santos City—Patay sa pagpamusil si Malapatan, Sarangani province Former Councilor Montacier Celozar Singcoy, 41 anyos, residente sa Poblacion, Malapatan, Sarangani province, natigayon ang krimen alas 8:30 kagabie, April 25, 2021, sa may Purok San Jose, Barangay Baluan, General Santos City.
Subay sa spot report sa Police Station 3, usa ka concern Citizen ang mireport sa ilang buhatan bahin sa maong insidente. Pag-abot sa lugar, nakit-an ang patayng lawas sa biktima sulod sa iyang sakyanan nga usa ka Toyota Hilux kolor itom nga may plate number MEX 207.
Gidala usab sa miresponding Barangay Tanod sa ospital ang biktimang si Akiba Alhabsi Singcoy, 43 anyos asawa ni Montacier Singcoy human nga nakaangkon kini ug samad pinusilan sa iyang wala nga bitiis, samtang usa pa ka biktima nga si Aldren Celozar Singcoy, 18 years old, igsuon ni Montacier ang nahidangat sa Dr. Jorge Royeca Hospital kansa nakaangkon ug samad pinusulan sa iyang tiyan nga bahin. Swerte usab nga walay igo ang usa pa ka kaubanan sa mga biktima nga si Rolando Ogilla Flores.
Sa inisyal nga imbistigasyon sa kapulisan nasuta nga gihatod sa mga biktima ang higala ni Akiba Singcoy sa Purok Bagong Silang, Barangay Baluan, pauli na unta sila sa Malapatan apan pag-abot sa Purok San Jose, Baluan, usa matud pa ka lalaki ang nagtindog daplin sa dalan diin kalit gipabuthan ang biktimang si Montacier Singcoy kansa maoy nagmaniho sa sakyanan niadtong higayona.
Nakapadagan pa sa sakyanan ang kanhing konsehal pasulod sa compound sa usa ka balay sa maong lugar apan laing duha pa ka suspek nga nakamotorsiklo ang mitumaw diin gisundan ang sakyanan sa mga biktima ug gipusil pila kahigayon ang kanhing konsehal nga hinungdan sa iyang kamatayon.
Paspas nga misibat ang mga suspek padulong sa Purok Pigado, Barangay Baluan human sa pagpamusil.
Narecover sa crime scene ang 16 ka Fired Cartridge ug tulo ka fired bullet sa suspected Caliber 45 pistol. Sa karon naghimo na ug makuting imbistigasyon ang kapulisan kalabutan sa maong insidente.
Photo Credit to the owner
