*General Santos City— Arestado sa gihimong operasyon sa hiniusang pwersa sa PDEA 12 ug Midsayap PNP uban ang militar ang kanhing sundalo pinaagi sa search warrant operation alas 4 pasado ang takna sa kadlawon sa Brgy. Bual Norte, Midsayap, North Cotabato. *
*Giila ni Kath Abad, tigpamada sa PDEA 12 ang suspek nga si Mark Marvin Macasarte 34 anyos nga residente sa nasangpit nga lugar.*
*Sumala niya nga tuig 2011 pa dihang dili na aktibo sa serbisyo ang suspek ug tuig 2014 dihang kini maaresto gumikan sa illegal nga droga ug nakagawas milabay’ng tuig gumikan sa plea bargaining. *
*Apan subli kining na-monitor nga nagpabilin sa illegal nga droga kung asa ang operasyon niini ang naglangkob sa Midsayap, ug Banisilan, North Cotabato.*
*Dugang pamahayag ni Abad nga nakuha gikan sa iyahang posisyon ang dili muubos sa 50 ka sachet sa gituuhang shabu nga anaa sa 12 ka gramo nga may street value nga 81, 600 ka pesos. *
*Lakip nga nakuha sa suspek ang usa ka 9mm gloc, managlahing buhing bala sama sa m16 ug 5.56mm ingon man usa ka granada. *
*Sa kasamtangan, ang suspek ang balhog na sa lock up cell sa kapulisan ug gihikay na ang kasong pagsupak sa sec. 5 ug 11 sa R. A 9165 ug R. A 10591.*
