Kapin sa 1.5 million pesos ang tabang pinansyal ang gihatag sa gobyerno ngadto sa 21 ka mga rebeldeng New Peoples Army kon NPA nga misurender sa mga sundalo sa 4th ID ug mibalik na sa poder sa gobyerno.
Matud ni 4th ID spokesperson Lt. Tere Ingente nga ang maong mga rebelde, kanhi nag-operate sa lalawigan sa Bukidnon.
Gidawat sa maong mga kanhi rebelde ang maong tabang pinansyal pinaagi sa usa ka seremonya nga nga gihimo sa Camp Bahian sa Malaybalay City, Bukidnon niadtong Martes.
Gibutyag ni Ingente nga ang tabang pinansyal nga nadawat sa maong mga kanhi rebelde ubos sa Enhance Comprehensive Local Integration Program kon E-CLIP.
Sa iyang mensahe, gipahayag ni Glenda Hope Beley, Program Manager sa E-CLIP ug Provincial Focal Person sa DILG-Bukidnon nga iyang gidasig ang uban pang mga rebelled nga mokanaog sa kabukiran ug ilang pahimuslan ang gitanyag nga financial assistance sa gobyerno.
Gipahayag usab ni Colonel Ferdinand Barandon, Deputy Brigade Commander sa 403rd Infantry Brigade nga makasiguro ang mga misurender nga mga rebelde sa sensiridad sa gobyerno sa paningkamot niini alang sa hingpit nga mapatuman ang government peace effort ug mo-alalay sa mga rebeldeng NPA nga gustong mobalik sa sabakan sa gobyerno.
