Bukidnon – Aminado ang Philippine Charity Sweepstakes Office kon PCSO Bukidnon nga apektado gayod ang ilang binulan nga kita tungod sa illegal nga swertes.
Sa interview sa RMN ngadto kang Mario Pelisco, provincial manager sa PSCO Bukidnon gibutyag niini nga base sa ilang statistika apektado gayod ang ilang sales tungod sa naghitak nga illegal swertes.
Gidepensa usab niya dili nila trabaho ang pagpangdakop tungod kay wala silay police power apan giklaro niini nga kung wala lang gayoy nag-operate nga illegal nga swertes anaa sa 35 million ang binulan nila nga sales apan kung adunay illegal anaa lamang sa 22 milyones ka pesos nga kita kada bulan.
Sigun ni Pelisco nga iyang na-obserbahan nga kung subsob ang pagpanakop sa kapulisan mutaas usab ang ilang sales.
Gi-angkon usab niya nga adunay mga lotto agent sa Valencia City ang nagreklamo tungod sa hinay ang kita gumikan usab sa rampant nga illegal nga sugal sa maong siyudad.
Samtang sa managbulag nga interview sa RMN ngadto kang PSI Jessel Longakit ang spokesperson sa PNP Provincial Command gibutyag niini nga aminado sila nga aduna silay nadunggan nga daghan ang werek-werek.
Apan gipaniguro nila nga ikaduha kini sa ilang prayoridad ang pagsumpo sa illegal nga sugal , sunod sa kampanya batok illegal nga droga.
