Davao City- Gipasigarbo ni Davao City Police Office City Director Senior Superintendent Alexander Tagum nga nagmalampuson ang Joint Major Anti-Criminality and Terrorism Operation nga gilusad sa Syudad gikan kagabii hangtud kaganing kaadlawon.
Gipasiatab ni Tagum nga milampos ang operasyon pinaagi sa hiniusang puwersa sa DCPO,PDEA 11, CIDG, Task Force Davao ug Maritime Police.
Base sa datos, misaka na sa kapin usa ka gatos ka mga nalambigit sa illegal drugs ug mga ‘wanted’ ang nadakpan uban sa nakumpiska nga mga sachet sa shabu, liboan ka mark money, ug ang mga drug paraphernalias.
Matud ni Tagum, bitbit sa mga otoridad ang mga search warrants ug mga warrants of arrest ug gisuhid ang pipila ka mga barangay sulod sa AOR sa dose ka police precincts resulta sa pagkasikop sa mga nahisgutan.
Gihikay na sa mga otoridad ang tukmang kaso subay sa paglapas sa Republic Act 9165 kun Comprehensive Dangerous Drugs Act of 2002 batok sa mga dinakpan.
Samtang lakip sa nasikop ang usa ka lalake kinsa gidudahan nga terorista sa may Bunawan City diin narekober sa operatiba ang giingong mga eksplosibo sulod sa pumpboat nga iya sa suspek kinsa sakop sa tribung Maguindanaoan ug adunay mga pending warrant of arrests tungod sa kasong pagpatay.
Joel Viray
