Mikabat sa kapin 28 mil ka bakanteng trabaho ang gitanyag sa kapin usa ka gatus ka kompaya atol sa gihimong Mega Job Fair niadtong Labor Day.
Kini ang gipahibalo sa Cagayan de Oro City Information Office.
Ang maong kalihukan gipaluyohan sa lokal nga kagamhanan sa Cagayan de Oro, Department of Labor and Employment, Department of Trade and Industry, TESDA ug mga pribadong sektor.
Gilusad usab atol sa kalihukan ang Technical and Educational Skills Development and Employment Council kon TESDEC ug ang Technical and Vocational Institute aron mahatagan og insaktong kapas ug abilidad ang mga job seekers.
Sa maong higayon, gipasiugda sa DTI ang Livelihood and Business Fair diin duna’y Negosyo Center Counselors nga naghatag sa giya sa mga buot makakat-on pag-negosyo.
Mihimo usab ang TESDA sa Skills Demo and TVET Enrollment alang sa 1,200 ka scholarship grants.
