Kapin sa 300 ka mga kanhi mangaykayay sa basura sa Cagayan de Oro ug miyembro na karon sa Material Recovery facility o MRF Producers Cooperative ang makabenepisyo sa bag-o lang giturn-over nga eco bricks facility.
Matud ni Jinkie Paid, Vice Chairman sa MRF Producers Cooperative nga dako ang ilang pasalamat sa lokal nga kagamhanan sa Cagayan de Oro nga wala sila gipasagdan sukad nga gisirad-an na ang open dumpsite sa Upper Dagong, Barangay Carmen ning syudad.
Gibutyag ni Paid nga gawas sa sari-sari store ug pagkuha sa mga recyclable materials gikan sa mga business establishments makahatag usab sa ilang dugang kita ang gihatag ng eco bricks facility nga gikan sa Nestle Philippines Inc, inabagan sa Green Antz ug lokal nga kagamhanan.
Samtang gibutyag usab ni Christine Ponce-Garcia, Corporate Affairs Executive sa Nestle Philippines Inc nga ang giturn-over nga eco-brick hub maoy pinaka-una sa Mindanao.
Gibutyag ni Garcia nga dunay pay laing tulo ka eco-brick hub ang tukoron sa Cagayan de Oro sa umaabot panahon nga nasabutan na usab sa Nestle Philippines, Green Antz ug lokal nga kagamhanan.
