Davao City – Moabot sa kapin kun kulang 4,000 ngadto na sa 5,000 ka mga bakanteng trabaho ang itanyag sa himuong job fair karong umaabot nga adlawng Miyerkules, July 25, 2018.
Kini ang gibutyag ni Erwin Cagape sa Public Employment Service Office kun PESO-Davao atol sa interview sa Serbisyong Straight to the Point.
Sumala niya nga gibana-banaang 4,000 ka mga local jobs ang bakante samtang anaa sa usa ka libo ka mga bakanteng trabaho sa overseas.
Himuon ang maong job fair sa Davao City Recreation Center (DCRC) kanhi Almendras Gym nga magsugod ang job fair alas 8 sa buntag kutob alas 4 sa hapon.
Samtang padayon usab nga himuon karong adlawa ang pre-registration sa Abreeza activity area.
Subay niini, nagpahinumdom si Cagape ngadto sa mga interesadong aplikante nga magdala og daghang resume, kinahanglan updated ang contact number ug email address ingon man presentable usab nga muatubang sa mga employers.
Dugang pa nga mamahimong muadto lang sa ilang opisina sulod sa almendras gym compound alang sa uban pang mga pangutana o bin ba kaha sa mga district offices sa PESO nga nahimutang sa nagkadaiyang dapit dinhi sa syudad sa Davao.
RadyoMaN Renz Barbarona
