Nanawagan karon si 2nd district Congresswoman Juliette Uy sa National Bureau of Investigation o NBI Region 10, Bureau of Fire Protection ug Department of Environment and Natural Resources Region 10 nga imbestigahan ang pagkasunog sa toni-toniladang basura sa Verde Soko nga gitambak sa Sitio Buguac, Barangay Sta Cruz, Tagoloan, Misamis Oriental.
Gusto ni Uy nga dakpon sa mga otoridad ug pasakaan sa kaso ang iresponsabling mga tawo nga nagsunog sa maong mga basura nga gitakda na untang ibalik sa nasud sa South Korea.
Kini Ang pahayag ni Uy, human iyang nasayrang ang mga basura sa Verde Soko nga gikan sa South Korea ang nasunog kagahapong adlawa.
Nagduda si Uy nga gisabotahi sa mga suspect ang controversial nga mga basura sa Verde Soko.
Matud ni Uy nga ang pagkasunog sa mga basura sa Verde Soko mahimong ilhon nga usa ka destructive Arson tungod kay ang maong insidente nahitabo sulod sa Phividec Industrial state.
Samtang, Gipahayag ni Misamis Oriental Board member Gerardo Sabal III nga iyang pangayoon sa Sanguniang Panlalawigan nga ilang imbistigahan ang maong Insidente.
Kini aron masuta kon gitoyo ba o wala ang pagkasunog sa kapin 5 thousand tones nga mga basura sa Verde Soko sa Sitio Buguac.
Matud ni Sabal nga manubag ang mga angayang manubag sa maong panghitabo.
Gipasabot niini nga iyang pangayoon sa liderato ni Vice Governor Jeremy JigJag Pelaez nga i-summon ang mga officials sa Verde Soko, Phividec Industrial Authority, Customs, DENR ug ang tanang stake holders sa maong mga basura.
