Naka-uli na niadtong Sabado, Mayo 16, ngadto sa CARAGA region ang kapin 500 ka mga estudyante human sila gitabangan sa pamunuan sa Mindanao State University o MSU Marawi.
Kini human sila na-stranded tungod sa community quarantine nga gi-imposar sa tanang dapit sa nasud nga maoy hinungdan sa pagkawala sa mga pampublikong transportasyon.
Kabahin kini sa Hatid Estudyante Program sa administrasyon sa MSU ug sa Land Transportation Franchising and Regulatory Board o LTFRB.
Kapin 370 sa maong mga estudyante ang nag-eskuwela sa MSU-Marawi campus, kapin gatus ang sa MSU-Iligan Institute of Technology o IIT ug napulo sa MSU-Naawan.
Miingon si MSU President Habib Macaayong nga bisan paman sa ilang pagka-estranded, gitabangan sila sa unibersidad pinaagi sa paghatag kanila sa ilang pagkaon ug uban pang mga panginahanglanon, lakip na ang pag-monitor sa ilang panglawas.
Sa ilang paglarga, gipadad-an sila og pagkaon.
Gipagamit sa Bachelor Express ang ilang 21 ka mga units sa bus samtang ang Petron ug ang Shell maoy mi-donar sa gasolina. Ang allowance sa mga bus drivers gihatag sa pribadong donor. (Divina M. Suson, Marawi City, May 18)
(photo credits to the owner)
