Davao City – Gipaboran ni Barangay 9-A Kapitan Tata Llubit ang nakab-ot nga hukom ni Presidente Rodrigo Duterte nga ibalik sa PNP ang ‘war on drugs’ gikan sa Philippine Drug Enforcement Agency (PDEA).
Gibarugan ni Llubit nga mas dakong bentaha kun naa ang puwersa sa kapulisan sa pakiggubat sa gidiling droga kay dako gyod og agi ikumpara kung ang PDEA lang ang mag-inusara sa kampanya.
Nagtoo si Llubit nga 80 porsento magmalampuson ang nasudnong kapulisan sa pag-chainsaw sa dakong punuan sa sindikato karon nga ibalik na kanila ang paglutos sa mga nalambigit sa droga.
Ang kapitan, naglatag og pipila ka sugyot sa kagamhanan ayha hingpit palargahon ang kapulisan sa ‘war on drugs.’
Segun niya, mas maayo muagi sa screening ang tanang mulangkob sa operasyon sa anti-drugs aron walay mga eskalawag makaapil ug dili masabotahe ang pagtuldok sa suliran sa droga sa nasud.
Dili kumbinsido ang kapitan nga adunay extrajudicial killings (EJK) sa ‘war on drugs’ ni Digong inay nagtoo kini nga pasangil lamang kini sa mga kritiko aron dauton ang gobyerno karon.
Dako ang kumpiyansa ni Llubit nga sa pagbalik sa kapulisan sa kampanya walay mulambigit sa EJK ni mopatay og mga drug personalities nga dili mopakita og pagsukol ug mutahan sa mga otoridad.
RadyoMaN Joel Viray
