ISABELA – Nagsungka na si Kapitan Roy Pagapang, 40 anyos sang Barangay Libas matapos ang isa ka shooting Incident kaina las 11:40 sang udto sa diin iya naluthangan ang mag-asawa nga Jomie, 40 kag May Janet Gelacio, 36 anyos.
Suno kay Chief Inspector Ruben Pajarito, hepe sang Isabela Police nga personal ang pagsungka ni Kapitan Pagapang kag nagplastar sang iya nga bahin kon anu gid ang matuod nga hitabo.
Sa paathag ni Kapitan, nagapakatig-a si Jomie nga magbaton sang summon nga iya ginpadala paagi sa iya Secretary nga si Efren Canja rasun nga sa ikaduha nga tion, nag-upod ini.
Imbis nga i-receive, ginhaboy sini ang summon kag ginhanaan pa nga bun-on si Kapitan.
Amu naman ni ang rasun kon ngaa iya gingabot ang iya .38 nga rebolber kag ginpasalbahan si Jomie apang, nag-igo ang bala sa tuo nga kamot sang asawa nga si May Janet.
Sa ikaduha nga pagpitik sang gatilyo, naigo na si Jomie sa iya nga dughan.
Sang naglakat na si Kapitan, nakakuha pa sang iya armas si Jomie sa diin natiruhan nya pa ang paryente sini nga si Ivan Gallete sa wala nga tiil.
Ang mag-asawa ang ginabulong karon sa Bacolod Adventist Medical Center samtang karsel naman si Kapitan Pagapang.
Sa una nga imbestigasyon sang mga otoridad, nagaguwa nga nagapanyaga gid ang mag-asawa sang gulpi lang nga nagsulod sa ila balay si Kapitan kag ginsumbag si Jomie.
Natumba si Jomie kag sang nagtindog, gintiro ini ni Kapitan, apang imbes nga mag-igo sa bana, asawa nga si May Janet ang naigo sa tuo nga kamot.
Sa pagtiro liwat, didto na kag naigo si Jomie sa iya nga dughan.
