Kapitan Pao Natividad nanghingusog nga angay lang makadawat og honorarium sa BCCF ang mga purok chairman nga nalista

9

General Santos City–Mapasigarbuhong gibutyag ni Barangay Apopong Kapitan Pao Natividad nga nakadawat na sa ilang mga honorarium ang mga miyembro sa Barangay Covid Control Force (BCCF) sa Apopong.

Giangkon sa Kapitan nga nalangan gyud ang paghatag niini ngadto sa mga BCCF sa ilang barangay tungod sa problema sa listahan.

Gibalik matud pa kini kanila sa syudad niadtong Oktubre 5 tungod sa mga kwestyon hinungdan nga ila usab gibalik sa mga purok chairperson aron dayong maaksyonan.

Kalabot niini nagpaklaro usab si Barangay Apopong Kapitan Pao Natividad nga walay kamatuoran nga adunay double entry sa listahan sa mga BCCF member.

Matud sa Kapitan nga dili double entry kundili double compensation tungod adunay mga trabahante sa barangay nga naapil sa listahan sa BCCF.

Aminado si Natividad nga bisan ang mga chairman sa ilang mga purok gadawatan man gyud og honorarium sa ilang barangay diin uban kanila nalista isip BCCF member.

Kalabot niini gihingusgan ni Kapitan Natividad nga sa iyang kabahin angay man usab nga makadawat ang mga Purok Chairperson og Allowance nga alang sa mga BCCF.




Kini gumikan kay gawas nga apil sila sa pagpaningkamot sa pagbantay batok sa covid-19 pinaagi sa pagpulaw aron lang mamonitor ang ilang kapurokan, gamay nga kantidad ra usab ang ilang ginadawat nga honorarium sa barangay.

Gibutyag sa Kapitan nga 500 pesos lang matag bulan ang madawat sa usa ka purok chairman isip honorarium gikan sa barangay hinungdan nga angay silang ikonsidera og matagaan.(JB)

Facebook Comments