Makilala, North Cotabato–Usa ang Barangay Kesante sakop sa lungsod sa Makilala sa mga labing naapektuhan sa pagtay-og sa 6.6 nga linog sa Mindanao niadtong Martes sa buntag.
Matud ni Kesante Kapitan Natalio Abing, mukabat sa kapin usa ka libo sa mga residenti sa iyang Barangay ang na-apektuhan sa maong linog. Sagad sa mga kabalayan nga nga gama sa light material ug bisan na mga kongkretong panimalay ang gibungkag sa linog.
Sa karon sumala pa aduna na silay tabang nga nadawat gikan sa lokal nga panggamhanan sa Makilala apan sa kasamtangan kinahanglan pa gyud nila ug dugang tabang.
Dugang pagbutyag ni Kapitan Natalio Abing nga usa ang ilang Barangay nga adunay fault line mao nga usa sila sa mga labing naapektuhan sa kusog nga linog.
Duha ka mga Purok sa iyang barangay ang labing apektado, kini mao ang Purok 6-A ug Purok 6-C.
Sa karon anaa matud pa sa mga evacuation center ang mga apektadong pamilya sa ilang Barangay. Ila matud pa kining gitunga tunga sa lima ka grupo, uban anaa sa ilang barangay Gym samtang ang uban ang anaa sa basketball court.
