Nadakpan sa managlahing operasyon sa kwerpo sa kapulisan sa rehiyon sa Caraga ang 14 ka mga wanted sa balaod, lakip ang usa ka Punong Barangay ug nailang si Jet Lee.
Giila ni P/BGen. Gilberto DC Cruz ang mga dinakpan nga si Crisanto Medrano Pontevedra, 63 anyos; Leonardo Oriendo Acosta, 36 anyos; Delbert Yurtas Manzano, 54 anyos ug Angel Bislielan Balaque, 52 anyos kinsa giila nga mga sugarol nga gikan sa Surigao del Sur.
Laing dinakpan mao si Rico Munoz Oliveros ug Mark John Oliveros sa Brgy. Mangagoy, Bislig city, Surigao del Sur ug Warren Tumarlas, 23 anyos gikan sa Brgy. Mahaba, Cabadbaran city, Agusan del Norte; ang nadakpan pinasikad sa warrant of arrest sa kasong “Murder” nga gipagawas sa korte ug walay pyansang girekominda.
Nadakpan usab si Mamerto Atipasado, 54 anyos sa kasong direct assault, Edwin Bastargo Castro, 55 anyos sa kasong estaffa; Christina, 57 anyos sa kasong Malversation of Public Funds, Rolito Marabi Abadingo, 46 anyos sa kasong paglapas sa Revised Forestry Code of the Philippines, Algen Toyco Labrador ug si Jet Lee Toyco Labrador sa kasong paglapas sa RA 7610.
Sa pikas bahin, ang Prosperidad Municipal Police Station kauban ang CIDG 13 ug 1301st Regional Mobile Force Battalion malampusong nakasikop sa magsoong si Cosme Ortiz Antallan, 43 anyos ug Ricky Ortiz Antallan, 41 anyos kinsa usa ka Barangay Kapitan sa brgy. Azpetia, Prosperidad, Agusan del Sur – gumikan sa pagkupot ug ihalas nga armas ingun man kalapasan sa Revised Forestry Code of the Philippines.
Nakuha sa posisyon ug control sa dinakpan ang kalibre .45 nga pistol, 12GA Shotgun, 14 ka bala sa kalibre .45; duha ka magazine sa kalibre .40 ug 44 ka bala sa kalibre .40, unom ka Balit ug Hindang lumbers nga mokabat sa 81.33 bd.ft. nga mokantidad sa 2,439 pesos.
Ang mga dinakpan nagtingkagol sa karsel sa kwerpo sa kapulisan.
[image: wanted hand cuff.jpg]
