Davao City – Arestado Sta. Ana PNP ang usa ka minor de edad nga si alyas Gogo, 17 anyos, nagpuyo sa may R. Castillo Agdao, siyudad sa Davao.
Kini human matud pa gireklamo sa ginikanan ang suspek nga gilugos ang iyang anak nga 13 anyos nga si alyas Jenjen.
Sa esklusibong interview sa DXDC RMN Davao ngadto sa suspek, gihimakak niini ang maong pasangil nga nanglugos.
Sumala ni Gogo nga duna silay relasyon ug nagkasinabot ang duha gani nananghid pa ang suspek nga iyang hilabtan ug wala niya kini gipugos gani miuyon ra usab ang iyang hinigugma nga si alyas Jenjen.
Giingon sa suspek nga andam siya makigminyo ug pakaslan ang iyang hinigugma kun anaa na sa ensaktong pangedaron apan wala nisugot ang ginikanan.
Ang suspetsado nga si Gogo gikustodiya na sa Sta. Ana PNP diin kagahapon pormal na napasaka sa korte ang kasong lugos batok sa suspetsado ug gikatakda nga ibalhin ang suspek sa Balay Pasilungan nahimutang sa may Brgy. 5-A Bankerohan ning dakbayan.
RadyoMaN Don Pulayao
