Ang polis na mismo karon ang mobisita sa mga barangay, tunghaan ug sa mga tawo nga nagkinahanglan og police intervention.
Kini ang gibutyag ni PO2 Carlos Victor Baculio II ang Assistant Police Community Relation Officer sa Police Station 10 Cugman atol sa interview sa dxCC-RMN sa Programang Tubag, Giya, Implementasyon ug Solusyon kon TUGIS.
Matud ni PO2 Baculio nga ilang ginahatag sa katawhan ang mga impormasyon nga angayang masayran sama sa paglikay sa mga kreminalidad, paglikay nga malambigit sa droga ug uban pa.
Gibutyag ni PO2 Baculio nga apil sa ilang sakop sa ilang Area of Responsibility kon AOR ang Barangay Tablon ug FS Catanico.
Samtang, matag semana, walay hunong ug walay kakapoy nga ginatuyok sa kapolisan sa Police Station 10 Cugman ang tulo ka area nga sakop sa ilang Area of Responsibility kon AOR.
Matud ni PO2 Baculio nga kini aron mahatud lamang sa katawhan ang mga angayan nga mahibaw-an.
Dugang pa ni Baculio nga aron maserbisyuhan ang katawhan sa tulo ka barangay, matag usa kanila adunay usa ka libo nga tawo ang alagaran.
Tungod niini, naghangyo karon ang kapolisan sa Cugman sa mga residente nga padayon sa gihimo nga kooperasyon ngadto kanila tungod kay kung walay suporta ang komunidad walay mahimo ang kapolisan.
