General Santos City— Blangko pa ang kapulisan sakop sa Police Station 3 sa posibleng motibo sa pagpusil-patay sa usa Juanito Diaz Jarane, 52 anyos nga residente sa Sunrise Subd. Brgy. Lagao ning dakbayan ug kanhing miyembro sa Civil Security Unit ug pagka-angol sa laing duha nga silang Joni Bitacura ug Aldrin Alinsangin,
Sumala kang Police Chief Inspector Peter Pinalgan Jr. hepe sa Police Station 3 nga padayon ang ilahang ginahimo nga imbestigasyon sa maong kaso.
Sa karon matud pa ilaha pang mas gipalawman ang imbestigasyon ang maong insidente ug nakig-alayon na sila sa kabanay sa biktima aron makakuha ug dugang impormasyon nga posibleng makatabang sa pagsulbad sa maong krimen..
Dugang pamahayag ni PCI Pinalgan nga posibleng ang biktima gyud maoy target sa maong pagpamusil gumikan close range ang igo niini sa ulo nga hinungdan sa iyahang kamatayon.
Kahibaluan nga igo lang nga nag-tan-aw ug hantak ang biktima sa usa ka lamay sa may Nursery Road, Anas Subd. Brgy. Lagao dihang nahitabo ang pagpamusil ala una pasado ang takna sa kadlawon.
Sa karon, wala pa silay ginatutukan nga posibleng suspek sa krimen gumikan basi sa pamahayag sa anak sa biktima, naka-taptap ang nawong sa suspek ug naka-jacket ug itom.
