General Santos City–Padayon pa ang ginahimong imbestigayson sa kapulisan sakop sa Police Station 5 kung si kinsa ang responsable sa pagbilin sa batang bag-ong himugso atubangan sa usa ka tindahan sa Prk. San Miguel, Barangay Calumpang kagahapon sa buntag.
Sumala kang Police Major Richard Ybañez, Hepe sa Tambler Police Station nga gilayon nilang gidala sa barangay clinic ang maong bata aron maatiman.
Higayon nga masayran kung si kinsa ang inahan nga responsable sa pagbilin sa maong bata, ilaha kining pasakaan ug kaso.
Samtang dako ang kakurat ni Leah Diongson, hamtung ang pangidaron nga residente sa Prk. San Miguel, Barangay Calumpang human nga nakita atubangan lang sa ilang purtahan ang usa ka bag-ong himugsong batang lalaki nga gibilin sa wala mailhing inahan.
Sumala pa niini nga una nang nakadungog ang iyahang anak ug tingog sa usa ka bata diin nalaan pa nilang iring ang maong bata apan dihang ilang gisuta usa diay kini ka bag-ong himugso nga bata.
Nagkadugo pa ang nahisgutang bata ug anaa pa ang pusod niini hinungdan nga gilayong gidala sa barangay clinic sa Barangay Calumpang.(LVR)
