Pagpositibo sa LSI sa Malapatan., gilauman nang daan ni Mayor Sumbo

18

Malapatan, Sarangani Province–Gilauman nang daan ni Malapatan Mayor Jun Sumbo Jr. nga adunay magpositibo sa Covid-19 sa ilang lungsod gumikan sa pagdayong pag-abot sa mga Locally Stranded Individual (LSI) ug mga OFW nga gikan sa kauluhan ug uban pang lugar sa nasud nga adunay kaso sa COVID-19.
Nasayran nga nakatala na ang Malapatan ug unang kaso sa nagpositibo sa Covid-19 kansa usa ka LSI nga adunay Travel History sa Kauluhang Manila.
Hinuon walay angayang kabalak-an ang katawhan sa Malapatan tungod gikan sa Gensan Airport, deretso sa Isolation facility ang nahisgutan ug wala na usab kini gipagawas sa pasilidad.
Wala usab gitugtan ang pamilya niini nga siya mabisita sa ilang isolation Facility.
Dugang pagbutyag ni Mayor Sumbo nga ang nagpositibo sa Covid 19 sa ilang lungsod usa ka 26 anyos nga babaye nga usa ka LSI.
Miabot kini sa Lungsod sa Malapatan niadtong June 15 ug June 25 dihang gipailawom kini sa SWAB test. Niadtong Domingo sa gabie dihang migawas ang resulta sa iyang test nga nagpositibo kini sa Virus.
Nasayran nga tuig 2019 pa sa kauluhang Maynila ang nahisgutan gumikan mo-abroad unta kini apan wala nahinayon ug larga mao nga temporaryong nanarbaho sa kauluhan.
Luyo paman nga may kaso na sa Covid-19 sa Malapatan, nanawagan ang Mayor sa katawhan nga dili lang maalarma, inay ipadayon lang ang pagsunod sa mga health protocol para malikayan ang Covid-19.
Sumala sa Mayor nga stable man ang kahimtang sa pasyenti ug padayon na kini karon nga ginaatiman samtang anaa kini sa Isolation Facility.
Pahimangno ni Mayor Sumbo sa iyang katawhan nga ipadayon lang ang kooperasyon ug tumanon ang mga protocol aron mabatukan ang virus.

Facebook Comments