1,200 KA PERSONAHI SA PNP IPAKATAG SA TIBOOK REHIYON SA CARAGA
Taliwala nga sirado ang mga pribado ug pampublikong sam-ang dinhi sa dakbayan sa Butuan ug rehiyon sa Caraga sa pagsaulog sa Kalag-kalag sugod Oktubre 29 hangtud Nobyembre 4 ning tuiga apan magpakatag ug 1200 ka mga Pulis ang PNP Caraga.
Sirado ang mga sementeryo tibook nasud atol sa maong petsa agig pagsunod sa Inter-Agency Task Force Resolution No. 72.
Nasayran gikan ni PNP Caraga Regl Director PBGen. Romeo Caramat, Jr. na ang maong mga Pulis maoy tahasan sa pagbantay sa mga sam-ang, paluparan/tugpahanan, terminals, memorial parks lakip sa mga nag-unang kadalanan aron matagaan ug seguridad ang mga katawhan atol sa kasaulogan sa Undas.
Giklaro ni PBGen. Caramat nga mahimung moduaw ang mga tawo sa mga sam-ang sa dili pa ang undas o ba kaha human sa obserbasyon sa undas apan limitado lamang hangtud sa 30% ang ihap na mosulod sa bisinidad sa sementeryo ug kinahanglan magsuot sa face mask, face shield ug pag-obserba sa social distancing.
Dugang pahimangno sa kwerpo sa kapulisan alang sa mga mobisita sa sementeryo na bawal sa gihapon ang pagdala ug ilimnong makahubog, hait na hinagiban, armas ug mga gamit pagsugal.
